Ministri i Turizmit, Blendi Klosi, ka çuditur qytetarët e madje rrjeti ka shpërthyer në meme, pasi ka dhënë një argument paradoksal se përse nuk lejohet muzika në kafene. Klosi tha se valët përhapin virusin, një argument i ri ky që nuk ishte dëgjuar më parë, por që ministri e tha me siguri, sipas së cilit është e vërtetuar shkencërisht.
“Nuk duhet t’ia bëni pyetjen ministrit të Turizmit, se për politikat e turizmit do ishte shumë mirë që të ishin të hapura, por kjo pyetje i duhet bërë ekspertëve, që gjykojnë se zonat me muzikë dhe kjo është e vërtetuar janë zonat ku virusi hapet më shumë se në çdo vend tjetër, pasi valët e muzikës janë ato që përçojnë virusin.
Në distancat që jemi ne të dy, mund të mos ketë përçim, në distancat ku ka valë muzike përhapja e virusit është më e madhe. Dhe në ambientet me muzikë sidomos ku përdoret pija alkoolike, njerëzit duke qenë më pranë njëri-tjetrit, lëshohen më shumë“, tha Klosi.
Epidemiologu Erion Dasho, ka bërë një shkrim të cilën e ka përcjellë në facebook, duke thënë me ironi se ministra janë dhe gafa bëjnë. Sipas tij, deklarata e tij nuk është aspak profesionale. Eksperti i Shëndetit Publik, Erion Dasho, thotë me tej se sa i takon ministrit që ngatërron tekstin me muzikën, kjo mund të kalohet edhe me një të qeshur.
Statusi
MINISTRA JANË, GAFA BËJNË
E hapi lojën Z. Klosi kur deklaroi se COVID përhapet nëpërmjet “valëve të muzikës” duke hyrë në një fushë ku nuk e lidh as profesioni dhe as objekti i ministrisë që drejton. Sikur të mos mjaftonte gafa e parë shprehjes së habisë nga ana e moderatorit, ju përgjigj me fjalë dhe gjeste siguruese duke e garantuar se ato që thoshte ishin e vërteta e kulluar e cila nuk duhet vënë në dyshim.
Më vonë ministrja e financave ju rikthye një teme tashmë të konsumuar nga kolegia e vet e shëndetësisë, rolit që ka testimi në kontrollin e COVID. Edhe ministrja e financave në një fushë ku nuk ka as kompetencë dhe as tagër të përfshihet si përfaqësuese e qeverisë deklaroi sërish se testimi nuk është i rëndësishëm për kontrollin e përhapjes së COVID. Në ndryshim nga kolegu i turizmit, ministrja e financave deklaroi burimin e këshillës që ishte komiteti i ekspertëve.
Deklaratat e dy ministrave janë jo-profesionale dhe ngatërrojnë më tej publikun i cili është lënë në mëshirë të sëmundjes nga qeveria ku ata bëjnë pjesë.
Dy ministrat do të bënin mirë sikur të fokusoheshin në fushat e tyre që janë dy sektorët më të dëmtuar nga pandemia dhe të lënë specialistët e shëndetësisë dhe shëndetit publik të sqarojnë publikun.
Testimi është fillesa e trinomit testo-gjurmo-trajto!
Këtë trinom janë duke e zbatuar të gjithë vendet e përgjegjshme dhe nuk ka ngelur ta vendosë në diskutim komiteti i të paaftëve shqiptarë që paska nisur të rijapë këshilla pasi kaloi verën në ilegalitet!
Për sa i takon ministrit që ngatërron tekstin me muzikën, kjo mund të kalohet edhe me një të qeshur…
https://www.facebook.com/edasho/posts/10159047653612259
