Avokati Spartak Ngjela është ndalur në lëvizjen urgjente që bëri kryeprokurori Çela me marrjen e detyrës. Pas takimit me drejtues të Prokurisë së Durrësit, në një deklaratë për mediat Olsian Çela u shpreh i kënaqur nga rezultati i deritanishëm i punës, dhe shprehu mbështetjen që Prokuroria e Përgjithshme do ti ofrojë.
Ngjela thekson në komentin e tij, se nëse ai realizon hetimin ndaj krimit të organizuar në Durrës e Tiranë, atëherë Olsian Çela i ka shërbyer siç duhet vendit. Sipas tij, kjo përkthehet në faktin se ai dhe ekipi i tij do jenë drejtuesit moralë të shtetit shqiptar.
Më tej, avokati sqaron se çështjet shqiptare kërkojnë hetime të plota, e mbi të gjitha moralitet që vendoset me anë të ligjit. Lëkundjet e tokës shembën pallate e ndërtesa në Durrës e Thumanë. E ndërsa avokati kërkon të dijë se çfarë fshihet pas krimit në Durrës. Ai është i mendimit se Rama është është i përfshirë në këtë krim të madh. Por të shqetësuar, sipas tij, janë edhe Sali Berisha, Ilir Meta dhe Lulzim Basha.
Statusi
“Prokurori i ri i Përgjithshëm duhet ta dijë që, nëse e realizon hetimin e imët të krimit të madh shtetëror me mafien e ndërtimit në Durrës dhe Tiranë, i ka bërë Shqipërisë shërbimin më të madh në njëqind vjet.
Por, edhe karrierës së tij në Shqipëri. Ai dhe ekipi i tij do të jenë pa dyshim drejtuesit moralë të shtetit shqiptar në një të ardhme të afërt. Por, a e kuptojnë dot këtë prokurorët shqiptarë!
Zhvillimi shqiptar sot kërkon moralitet dhe duhet ta kuptojnë të gjithë që moraliteti vendoset me anë të ligjit. Mungesa e ndëshkimit ka shtypur ligjin dhe legjitimitetin në Shqipëri, prandaj, ndëshkimi i autorëve të këtij krimi të madh, fillon etapën historike të vendosjes së moralitetit në drejtimin e shtetit shqiptar.
Çfarë po fshihet në krimin e Durrësit?
Nga shqetësimi i kryeministrit shqiptar, dhe nga gënjeshtrat e tij për historinë e pallateve të rrëzuar kuptohet se ai, vetë ose familjarisht, është i përfshirë në këtë krim të madh.
Por, të shqetësuar janë gjithashtu edhe Saliu, Meta dhe Basha, kuptohet që janë të përfshirë në pallatet e rrëzuar.
Kjo është gjendja e krimit, prandaj Rama është lëshuar si i çmendur për të zhdukur gjurmët. Po prokurorët, do të shiten apo do të tremben në këtë rast hetimor? Kjo do të varet nga forca që do të tregojë Prokurori i Përgjithshëm.
Në çdo hetim ngrihen pyetjet thelbësore ku duhet të mbështetet zbulimi i së vërtetës.
Në lidhje ne këtë çështje hetimore që ka filluar nga prokuroria, pyetjet që unë i ngre Prokurorit të Përgjithshëm dhe prokurorëve të hetimit janë këto:
Sa pallate iu janë rrëzuar shitësve familjarë të Ramës, Berishës dhe Metës në Plazhin e Durrësit?
Ku është gjetur pronësia mbi truallin në bregdet, dhe, si e ka historinë kjo pronësi në breg të detit, kur dihet se bregdeti ka qenë tokë shtetërore absolute?
Kur është shitur bregdeti, nga cili kryeministër, dhe si?
Cilat janë firmat e ndërtimit dhe pronarët e parë të pallateve të rrëzuar?
Çfarë lidhje kanë këto firma ndërtimi me kryeministrat Berisha, Rama dhe Meta?
Nga sa apartamente kanë disponuar familjarët e Ramës, Berishës dhe Metës në pallatet e rrëzuar, por edhe në ata që nuk janë rrëzuar nga tërmeti i 26 nëntorit?
Sa janë përfshirë gratë dhe fëmijët e kryeministrave në tregun e ndërtimit në plazhin e Durrësit, dhe si?
Zoti Prokuror i Përgjithshëm; këto janë pyetjet që ngrenë shqiptarët sot. Çfarë mendoni për këto pyetje, a do të marrin një përgjigje që t’i qëndrojë të vërtetës?
Zoti Prokuror i Përgjithshëm; ju mendoni se unë po pyes kot?
Jo, unë nuk pyes kot, dhe i ngre këto pyetje që t’i hetojë edhe gazetaria.
Edhe gazetarët, televizionet dhe gazetat që do t’i japin me fakte përgjigjet e pyetjeve të më sipërme, do të lansohen në historinë e shpejtë të Shqipërisë. Të tjerat medie që do t’i fshehin, sigurisht që do të ndëshkohen bashkë me të inkriminuarit në këtë krim shtetëror.
Krimi i bashkëpunimit korruptiv të politikës së lartë me mafien e ndërtimit, duhet të hetohet domosdoshmërish; kjo është kërkesë imperative e kësaj kohe historike.
