Policia Kufitare e Vlorës ka dhënë të tjera detaje lidhur me djegin e anijes turistike pranë brigjeve të Karaburunit mëngjesin e sotëm.
Në njoftimin e policisë, thuhet se autoritetet iu kanë ardhur në ndihmë 5 personave, të cilëve iu rrezikua jeta, si pasojë e zjarrit të rënë në mjetin lundrues në të cilin ndodheshin.
“Mjeti lundrues i “Aqua Marine” duke qenë se punon me turistët nga Moli i Vlorës drejt Karaburunit, për shkak të luhatjeve të kohës, është shkëputur nga Moli i Vlorës në fundjavë dhe është ankoruar në Karaburun, me qëllim që të ishte e përgatitur për vozitjen e turistëve atje. Në orët e para të mëngjesit në Karaburun pranë plazhit të Shën Vasilit, në këtë mjet lundrues ka rënë zjarr duke u rrezikuar jeta e disa shtetasve”, njofton policia.
Ende mbeten të paqarta shkaqet e rënies së zjarrit. Ndërkohë, grupi hetimor po kryen veprimet e mëtejshme për zbardhjen e plotë të ngjarjes.
