Prej muajsh kriza politike në vendin tonë duket se nuk është aspak pranë zgjidhjes. Përkundrazi, çdo ditë e më tepër ajo është duke u thelluar. Partia Socialiste sot është në ditën e saj të fundit të të bërit fushatë. Ndërkohë Partia Demokratike që pas protestës së fundit në 21 Qershor, ka mbajtur një profil më të ulët. Por, përsëri ajo vazhdon paralajmërimin se do të pengojnë zgjedhjet e 30 Qershorit. Në anën tjetër Presidenti Meta ditën e djeshme lajmëroi datën e re të zgjedhjeve lokale në 13 Tetor, por kjo gjë nuk u pranua nga mazhoranca.
Në një situatë të tillë më shumë se qëllimin për të bërë më të mirën për popullin, kanë në plan të parë interesat vetjake. Edhe pse në çdo dalje publike flasin në emër të popullit, ky i fundit në realitet është shumë i lodhur me situatën aktuale. Tirana Today i pyeti se çfarë do t’i thoshin politikanëve nëse do t’i kishin përballë dhe prej përgjigjeve të tyre kuptohet që kërkojnë zgjidhje sa më shpejt.
“Këto janë bërë të gjithë sa politikanë e sa qytetarë mashtrues. Po t’i kisha përballë do u thoja që ta ndihmojnë popullin dhe t’i kthejnë sytë nga populli fukara. Nuk do i ndaj, sepse njëlloj janë të gjithë dhe të njëjtën gjë kërkoj nga të gjithë. Të shohin popullin.”
“Ramës do t’i thosha që ti je babai i këij vendi, ndaj mblidhi kundërshtarët dhe bisedoni që ta mbyllni këtë sherr. Bashës do i thoja t’i lutej Ramës që të shkojnë të flasin.”
“Ramës dhe Bashës do t’i thosha të anulojnë zgjedhjet, kurse Metës do t’i sugjeroja të linte postin e presidentit. Dhe të rimarrë LSI-në që të luftojë Ramën, por nuk e dimë a e lë apo jo Monika. Meta ka qenë më mirë në drejtimin e partisë, ai e do Shqipërinë. Kurse Monika do paratë.”
Edhe ata qytetarë të cilët mbështesin fortë një krahë a një tjetër, shprehen se politika duhet të marrë masa për të dalë nga ngërçi.
“Nëse do të kisha përballë Ramën do t’i thosha të rrijë e të vazhdojë të punojë dhe bëjë shtet. Ndërsa Basha të thyejë qafën, kurse Meta para Bashës. Po iku Rama, Shqipërinë e mori lumi. Shqipëria do të bëhet dragua i Europës shumë shpejt.”
“Për Edi Ramën, nëse ka ndonjë trim këtu në Shqipëri t’i fusë ndonjë plumb ballit dhe të biem rehat. Sepse e shkatërroi fare Shqipërinë. Basha është njëri i shkolluar, njeriu më i mirë që ka Shqipëria. Kurse te Berisha nuk vjen asnjë, ai është fantastiku më i madh. Unë Berishën do e mbaja të supi im.”
“Tani njeriu do të zgjedhë të keqen më të vogël dhe ai është Rama. Basha bashkë me, Monën, Metën, Berishën duhet të ikin një orë e më parë. Thashë jo sepse Rama është gjeni, por sepse është e keqja më e vogël.”/ TIRANA TODAY
