Analisti Enver Bytyçi, teksa ka komentuar zhvillimet më të fundit Kosovë-Serbi, ka thënë në A2 se mund të ketë një marrëveshje mes Uashingtonit dhe Moskës.
Duke analizuar këtë situatë tejet të nxehtë, ai thotë se në këtë tablo të përgjithshme, të duket sikur SHBA dhe BE janë në garë për t’i dhënë fund konfliktit shqiptaro-serb.
“Është vërtetë interesante dinamika e zhvillimeve të fundit, ku SHBA dhe BE duken sikur janë në garë, për t’i dhënë fund konfliktit shqiptaro-serb.
Në garë më duken edhe presidenti i Kosovës dhe kryeministri Hoti, janë në garë se kush do të udhëheqë dialogun. Në këtë kuptim, unë them se situata ka marrë një zhvillim të ri. Lajçak është në Prishtinë dhe do të takohet me Hotin, por nuk është e sigurt nëse do të takohen me Thaçin, i cili ka kundërshtuar kryesimin e dialogut nga Lajçak, me pretekstin që Sllovakia ende nuk e ka njohur Kosovën”.
Richard Grenell, i dërguari i posaçëm i presidentit Donald Trump për bisedimet Kosovë – Serbi, tha se palët do të takohen më 27 qershor në Uashington. Sa i takon këtij takimi, analisti thotë se mbetet skeptik për rezultatin e kësaj marrëveshje.
“Më datën 27 qershor, palët do të jenë në SHBA për të dialoguar lidhur me zgjidhjen e konfliktit dhe mundësinë e nënshkrimit të një marrëveshje. Jam skeptik për rezultatin e kësaj marrëveshje, pasi në qëndrimin e Shtëpisë së Bardhë ndaj Kosovës, kam vënë re disa dilema.
Po ashtu, Trump dhe ambasada e shohin Kosovën si dinasti Clinton dhe presidentëve Bush. Aspekti i tretë ka të bëjë me faktin se administrata e Trump është në konflikt me BE-në dhe Grenell ka nxitur forca ekstremiste, të cilat tradicionalisht kanë dëshmuar se qëndrojnë në lidhje me Kremlinin. Nuk dëshiroj të jetë kështu, por kam frikë se ekziston një marrëveshje mes Moskës dhe Uashingtonin lidhur me këtë çështje”, u shpreh Bytyçi.
