“Vjet në këtë kohë hapi shampanjën dhe tha u hapën negociatat.” Analisti Andi Bushati duke folur për rekomandimin pozitiv të dhënë nga ana e Komisionit Europian për çeljen e negociatave të Shqipërisë me BE tha se Rama gjithmonë krijon një alibi për të mos parë ku i ka problemet pushteti.
I ftuar në rubrikën “Opinion” ndërsa komentoi protestën e fundit paqësore të opozitës, Bushati u shpreh i bindur se ajo nuk ishte fryt i presionit të ndërkombëtarëve, por një shpresë e opozitës për të nisur dialogun me Ramën.
“Gjatë këtij viti po shikojmë trajektoren e deklaratave. Janë shumë kontradiktore. Vjet në këtë kohë hapi shampanjën dhe tha u hapën negociatat. Para tre muajsh hodhi një tezë tjetër, për ne hapen negociatat, por ata europianët kanë politikat e tyre të brendshme, për shkak të ksenofobistëve europiane ne penalizohemi. Dakord, po pranojmë tezën që faji qenka tek Europa po nëse i hapen Maqedonisë? Kur e pyetën kështu ai tha: Këtë kërkojani Lulit. Pra, gjithmonë gjen një alibi për të mos parë ku i ka problemet pushteti.
Nuk besoj se presioni ndërkombëtar e ka shtyrë opozitën drejt protestave paqësore. Duket që opozita është e bindur, faktorët e tjerë ka vendosur të mos i dëgjojë për momentin. Unë jam i bindur që çdo lloj negocimi e nxjerr të humbur opozitën. E vetmja gjë që s’duhet të bëjë është të ulet me Ramën. Opozita e ka këtë shpresë. Opozita po përkund shpresën e kompromisit dhe uljes në tryezë ndaj dha shenjë që s’po të qëlloj në protestë. Unë jam i bindur që nuk duhet të ulen”,- tha Bushati.
