Ish-ministri i Jashtëm, Ditmir Bushati deklaron se mes Kosovës dhe Serbisë s’mund të ketë barazi, sa i përket krimeve gjatë luftës.
I ftuar në emisionin “Real Story” në News24, Bushati tha se nga njëra anë janë krimet e Serbisë në emër të një gjenocidi të spastrimit etnik të popullatës shqiptare në Kosovë, dhe nga ana tjetër krime të supozuara nga disa persona të veshur me uniforma ushtarake nga Kosova që ishte UÇK-ja.
Bushati shprehet se beson tek pafajësia e Thaçit dhe Veselit. Sipas tij, kjo situatë mund të pritej pasi në Kosovë janë disa persona, që janë ende në proces nga Tribunali i Hagës.
“E tha dhe kryeministri në parlament, natyrisht që në mënyra të ndryshme, në forma të ndryshme ne dinim që kishte një proces ndaj disa emrave. Dihej që do vinim në këto lloj situatash. Ideja për të falur krimet ishte për një barazi të krimeve serbe dhe ato të supozuara të UÇK-së. E para s’mund të ketë barazi mes këtyre. Gjenocidi serb përkundrejt personave të veshur si ushtarakë.
Unë besoj në pafajsinë e Thaçit dhe Veselit. Siç kam besuar tek Haradinaj. Përndryshe nuk do ishim në këtë diskutim. Ku ka një aktakuzë, duhet të verifikohet para institucioneve të drejtësisë. Nuk e kam një informacion ligjor të tillë, por edhe nëse do e kisha nuk do jepja”, tha ai.
