Deputeti i Partisë Socialiste, Ervin Bushati, është shprehur se presidenti Meta është në konflikt interesi dy herë me Gjykatën Kushtetuese. Ai vuri në dukje se Meta është themeluesi i një partie, me aksione familjare. Bashkëshortja e tij, Monika Kryemadhi, është edhe kryetarja e LSI-së.
“Në radhë të parë, në qoftë se shkarkohet nga komisioni hetimor, do të kalojë nga Gjykata Kushtetuese. Dhe ky është konflikti i parë. Dhe i dyti, presidenti Meta është themeluesi i një partie që është në opozitë, pra një parti me aksione familjare. Bashkëshortja e presidentit, është kryetarja e një partie opozitare”, theksoi ai në “45 Minuta” në Report Tv.
Bushati tha se Reforma në Drejtësi do të vazhdojë, pasi ka edhe mbështetjen e ndërkombëtarëve. Përsa i përket zgjidhjes së ngërçit të Gjykatës Kushtetuese, Bushati deklaroi se duhet zgjidhur në mënyrë institucionale.
“Reforma në Drejtësi do të vazhdojë, është vullneti i qytetarëve shqiptarë. Ka patur një dakordësi në masë absolute, janë votuar me 140 vota ndryshimet kushtetuese nga të gjithë deputetët e Kuvendit. Ka mbështetjen e partnerëve tanë strategjikë, SHBA, BE dhe të të gjitha vendeve europiane. Dhe patjetër që i duhet Shqipërisë. Ne do ta vazhdojmë atë pavarësisht kostos”, tha Bushati.
“Të gjithë e dinim se do kishte kosto. Se deri ku do të arrinte reagimi, apo çfarë formati do merrte, këto janë ato çfarë po shohim këto ditë. Pra, metastazat e sëmundjes kanë qenë të mëdha. Nuk kanë qenë vetëm në sistemin gjyqësor, apo në sistemin e drejtësisë, ku 70% e gjyqtarëve dhe prokurorëve po dalin që nuk kalojnë Vettingun. Pra janë nxjerrë jashtë nëpërmjet KPK, dhe patjetër do kishim zgjatje. Do kishim gjymtyrë edhe në sistemin politik, dhe kjo tregon se ka reagime edhe në sistemin politik”, tha më tej ai.
