Tonet e zërit u ngritën dje në “Open”, teksa diskutimi lidhej me publikimin e pagave. Zëvendësministri Besart Kadia, ka pasur një përplasje të fortë me gazetarin Andi Bushati. Ky i fundit tha se të dhënat janë publikuar, për tu shantazhuar qytetarët, ndërsa Kadia e kundërshtoi këtë. Debati degradoi më tej në fyerje personale, ndërsa Bushati i mëshonte faktit se gjithçka që ka të bëjë me rrjedhjen e informacionit lidhet ngushtësisht me shantazhin.
Pjesë nga debati:
Besart Kadia: Pse duhet qeveria që të publikojë të dhënat e tilla, kur në fakt i zotëron dhe i akseson në çdo çast. Kush e bën këtë?
Eni Vasili: Për të shantazhuar në mënyrë elektorale, thotë Bushati
Andi Bushati: Por si mundet?
Besart Kadia: Por çfarë do i thotë? Kjo është marrëdhënie e përjetshme, si mund të shantazhohet një njeri pse ka paguar taksa se nuk e shpjegoj dot…?!
Andi Bushati: Po se unë di hallin tënd, çfarë do motra jote, çfarë do babai jot, je i zhveshur, të ka dorë shantazhuesi.
Besart Kadia: Po bën shantazh Andi Bushati kur i nxjerr pagat, a po bën shantazh ndaj kolegëve të tu, a po bën apo jo?
Andi Bushati: Ore nganjëherë kolltuku në ministri mund të lyesh dhe fytyrën me m*t për të ruajtur karrigen, mund ta bësh edhe këtë.
Besart Kadia: Mos përdor fjalë që i ha më vonë.
Të dhënat financiare të mbi 630 mijë qytetarëve qarkulluan lirisht përmes aplikacionit whatsapp, dhe po ashtu dje doli një listë e shtuar deri në 690 mijë punonjës, ndërsa qeveria deklaroi se nuk ka ndodhur eksport dixhital i bazës së të dhënave. Materiali përmbajnë të dhëna personale si numrin e kartës së identitetit, numrin e identifikimit të shoqërisë ku janë punësuar ata, përfshirë dhe pozicionin e punës.