“Ruajtja e paqes botërore është përgjegjësia jonë e përbashkët dhe premtimi ynë solemn, i mishëruar në statutin e Organizatës së Kombeve të Bashkuara”
Kjo frazë u tha nga Ministri i Punëve të Jashtme i Shqipërisë, Ditmir Bushati në një fjalim të mbajtur në takimin e nivelit të lartë për paqen e organizuar nga Kombet e Bashkuara, shkruan balkaneu.com.
Sipas tij, vendosja e parandalimit në qendër të aktivitetit të OKB-së kërkon një bashkim koherent të tre shtyllave të OKB-së: paqen dhe sigurinë, zhvillimin dhe të drejtat e njeriut.
“Për më tepër, Shqipëria është e bindur se ruajtja e të drejtave dhe lirive të njeriut lidhet me parandalimin e konflikteve dhe ruajtjen e paqes“, shtoi ai.
Por ndërkohë vetëm katër ditë më parë Departamenti Amerikan i Shtetit deklaron se problemet më të konsiderueshme të të drejtave të njeriut në vitin 2017 në Shqipëri, ishin “kufizimet në lirinë e shprehjes dhe të shtypit, përfshirë autocensurën dhe frikësimin e gazetarëve shkaktuar nga interesat financiare dhe politike; dhe korrupsioni i përhapur në të gjitha degët e qeverisë”.
Për sa u takon zgjedhjeve, raporti i referohet OSBE-së, kur thotë se zgjedhjet respektuan liritë themelore por u ndikuan negativisht nga akuzat për blerje votash dhe presion ndaj votuesve.
https://tiranatoday.com/raporti-dash-korrupsioni-perhapur-ne-te-gjitha-deget-e-qeverisjes-shqipatre/
Në raportin e përvitshëm për të Drejtat e Njeriut thuhet se mosndëshkueshmëria mbeti një problem serioz.
“Ndjekja penale dhe veçanërisht gjetja fajtorë e zyrtarëve që kanë kryer shkelje ishte sporadike. Zyrtarët, politikanët, gjykatësit dhe persona me interesa të fuqishme biznesi ishin shpesh në gjendje të shmangnin ndjekjen penale”, thuhet në raportin që doli të premten. TIRANA TODAY
