Aleanca për Mbrojtjen e Teatrit u zhvendos pasditen e sotme në Kukës, ku po mbledh firmat për peticionin për rindërtimin e Teatrit. Ata kanë mbledhur firma për rindërtimin e Teatrit nën moton ‘Ku ishte dhe siç ishte’. Protesta është mbështetur edhe nga dega e Partisë Demokratike në Kukës.
Regjisori Rubert Budina ka paralajmëruar se nga nesër, do të ketë surpriza. Aleanca për Mbrojtjen e Teatrit do të dorëzojë nesër në SPAK dy dosje të reja për akuzën “tentativë vrasje të artistëve”. Lajmi është bërë i ditur nga regjisori Edmond Budina, gjatë protestës që kanë zhvilluar në Kukës për mbledhjen e firmave. Po kështu Budina zbuloi se artistët i kanë kërkuar kreut të shtetit Ilir Meta, që të hapë një hetim ndërkombëtar.
“Ne do e çojmë peticionin për t’i bërë të ditur Ramës që e duan tempullin e demokracisë shqiptarët, të njëjtin peticion do e çojmë në Europë. Se shqiptarët e duan kulturën e tyre, se europianët janë më të bindur se kurrë që shqiptarët mund të futen në Europë vetëm nëpërmjet kulturës. Kemi marrë mesazhe inkurajuese për lëvizjen tonë. Na nxisin që të vijojmë përpara, se ne kemi luftuar me fjalë. Në këmbim morën dhunën e kryeministrit, na e shembën dhe shtëpinë.
Ne dhamë dëshmorin e parë të rrugës “Dëshmorët e Kombit”, për t’i bërë të qartë Europës se çfarë makabri është ky kryeministër. Nesër do të dorëzojmë dy dosje të reja në SPAK për “tentativë vrasje të artistëve”, i kemi kërkuar presidentit që të hap hetim ndërkombëtar. I kemi kërkuar delegacionit Europian në Tiranë. Na ka premtuar se do sjellë në Tiranë prokuror ndërkombëtar dhe jemi të bindur se me gjithë këtë presion diplomatikisht do ua kthejmë shqiptarëve dinjitetin”, tha Budina.
