Kreu i Urgjencës Kombëtare, Skënder Brataj, në një intervistë për A2 është shprehur se fillimi i gushtit pritet të jetë piku i epidemisë së koronavirusit në Shqipëri.
Të infektuarit do të jenë më të shtuar se aktualisht, e po ashtu dhe humbjet e jetës. Ai ka arritur në këtë përfundim, duke iu referuar shkeljes masive së masave nga qytetarët, por dhe rihapjes së transportit publik që ende nuk ka dhënë efekte në rritjen e infeksionit.
“Nuk është piku akoma ky që po shohim tani. Fillimi i gushtit do të shënojë majën e kurbës së infeksionit, për shkak të lirimit të të gjitha masave.
Masa e fundit e lirimit është transporti publik, që nuk ka as 10 ditë që është hapur dhe kuptohet që i do 3-4 javë që nga përhapja e infeksionit, inkubacioni dhe shfaqja e shenjave të sëmundjes. Pastaj sesi do të vazhdojë piku, kjo do të varet si do të ndërgjegjësohemi ne”, tha më tej ai.
