Muaj më parë diskutohej nëse duhej mbajtur maska edhe në ambiente të hapura. E ndërsa sot studiuesit janë mëse të bindur se maskat janë mjeti i duhur për të mbrojtur veten dhe të tjerët përreth nesh, pasi virusi përhapet shpejt. Kreu i Urgjencës Kombëtare, Skënder Brataj, në një intervistë në “ABC-ja e mëngjesit”, sqaroi se me përdorimin e maskës nuk ndalohet virusi, por ndalohen spërklat. Gjatë një bisede, në një minutë nxjerrim 3 mijë spërkla. Ndërsa kur teshtijmë mund të nxjerrim deri në 1 milion spërkla. Brataj tha se pavarësisht venies së maskës, kjo nuk do të thotë se qytetarët janë 100% të mbrojtur.
“Maska është masë që vlen. Ne në dorë kemi higjienën, distancën dhe maskën. Maska nuk ka lindur për viruset, ka lindur për mikrobet. Ne nuk ndalojmë virusin, por ndalojmë spërklat. Në studimet e fundit është parë se gjatë një bisede në një minutë nxjerrim 3 mijë spërkla, kur teshtijmë mund të nxjerrim deri në 1 milion spërkla. Nëse virusi e ka 0-3 dimensonin, spërkla e ka 5-10 mikron.
Filtrat janë bërë deri në 5 mikron, spërkla është më e madhe dhe detyrimisht ndalon tek maska. Një spërkël mund të ketë 70 deri në 100 viruse brenda, pra koncepti i parandalimit është që ndalohen spërkla, pasi ne kur flasim nuk nxjerrim vetëm ajër.
Të mos harrojmë se të folurit normal është deri në 50 cm, kolla shkon deri në 1 m, teshtima shkon deri në 7-8 metër, imagjinoni sa miliona viruse nxjerrim një moment.
Pra këto miliona që dalin, ndalojnë tek maska. Kur vihet maska, si koncept brenda dhe jashtë ka këtë qëllim. Nuk po themi që jemi 100% të mbrojtur. Karantina është varianti i fundit dhe shpresoj të mos arrijmë deri te karantina”, sqaroi Brataj.
