Gjatë deklaratës nga Presidenca, Ilir Meta ka sulmuar sërish George Soros, duke deklaruar se nuk ka asnjë detyrim ndaj atij, por edhe nëse do kishte, do ia kishte shlyer.
I pyetur në lidhje me deklaratat e Partisë Demokratike që nuk komenton qëndrimin e Metës për Sorosin, ai u shpreh se nuk ndërhyn në asnjë debat të brendshëm të partive.
“Unë nuk ndërhyj në asnjë debat të brendshëm të një force politike. Unë nuk kam asnjë detyrim ndaj Soros dhe fondacioneve të tij, asnjëherë nuk kam përfituar asnjë biletë avioni apo ndonjë gjë tjetër, që të kem ndonjë detyrim apo brejtje ndërgjegje, por edhe po të kisha, do ia kisha kthyer, dhe do vazhdoja në mbrojtje të interesit kombëtar”, u shpreh Meta.
Sa i përket letrës së drejtuar kryeministrit Rama lidhur me një tërmet apokaliptik që mund të trondisë Ballkanin, ai dorëzoi 45 linqe nga mediat më të mëdha që shkruanin për këtë fenomen.
“Këtu keni të paktën 45 linqe, që nga BBC e gjithë mediat greke, ndërkombëtare, evropiane dhe ata që njëri i quan “kazan”, që kanë shkruar për tërmetin. Pak muaj më parë ndodhi një tërmet, jo i përmasave që është paralajmëruar, dhe ishte e vështirë për të menaxhuar ato pasojat atje. Nëse keni harruar, shkoni e pyesni banorët dhe fëmijët që u plevitosën. Unë kam bërë letër institucionale, zyrtare, në zbatim të detyrimit të tyre kushtetuese e ligjore”, u shpreh Presidenti.
