Vijon përplasja Presidencë-Qeveri, lidhur me ndryshimet në kodin e ri zgjedhor, pasi presidenti Ilir Meta kërkon që të merret opinioni i Venecias, ndërsa mazhoranca refuzon.
Zëdhënësi i Presidencës, Tedi Blushi ka reaguar pas deklaratave të deputetit të PS, Taulant Balla i cili tha se Komisioni i Ligjeve rrëzoi dekretin pasi kreu i shtetit do e fuste vendin në një spirale.
Blushi i bën thirrje Ballës që të reflektojnë deri të enjten dhe kërkon që mos të merret peng e ardhmja europiane e vendit.
”Z.Balla, reflektoni dhe thellohuni deri të enjten!Presidenti e dëgjoi thirrjen e Europës!
Dëgjojeni edhe ju! Boll e morrët peng të ardhmen europiane të Shqipërisë!’’, shkruan Blushi në Facebook.
Zëdhënësi i Presidentit ka publikuar edhe një mesazh të eurodeputetit Gahler më datën 5 tetor, i cili thoshte se është thyer marrëveshja e 5 qershorit.
Me 15 vota pro, Komisioni i Ligjeve vendosi që dekreti i Presidentit Meta për Kodin e Ri Zgjedhor të kalojë sërish në Kuvend ditën e enjte.
