Ministri për Diasporën, Pandeli Majko, ka pohuar edhe një herë se ai ka marrë kërcënime nga Irani rreth dy vite më parë.
Majko ka reaguar ndaj një lajmi lidhur me të ardhurat e tij, ku thuhej se ai kishte shitur një shtëpi për 20 mijë euro dhe kishte blerë një tjetër 232 mijë euro.
Ministri sqaroi se nuk e ka ndryshuar shtëpinë për biznes, por për shkak të sigurisë së familjes së tij, pas kërcënimeve që ka marrë.
Postimi i plotë:
Lexova se Gazeta “SOT” kishte botuar dokumentacionin deklarimit tim për të ardhurat pranë Inspektoratit të Deklarimit dhe Kontrollit të Pasurive .
Sipas artikullit kisha shitur një shtëpi për 20 mijë euro(!) dhe kisha blerë një tjetër 232 mijë euro… Duket qartë që ka pasur mungesë të verifikimit të dokumentave ligjore. Qartazi, vlera e shtëpisë së shitur në qendër ka mbuluar vlerën e shtëpisë së blerë përtej unazës së madhe të kryeqytetit.
Shtëpinë ku banoja më parë nuk kam pasur ndërmend ta shes. Ndryshimi i banesës ndodhi thuajse para një viti. Arsyeja e vetme për ta ndryshuar shtëpinë nuk është “biznesi” por ishte siguria e familjes pas kërkesës nga agjenci mike. Kjo e fundit është një fakt i cili është publikuar.
