Zv.ministrja e Shëndetësisë, Mira Rakacolli është shprehur se në spitalin infektiv në Tiranë ndodhen edhe 4 pacientë që nuk kanë lidhje me koronavirusin.
Gjatë konferencës për shtyp, Rakacolli sqaroi se me shtimin e rasteve të të prekurve, spitali do jetë i gjithi vetëm për të prekurit me koronavirus.
“Spitali Infektiv është ndërtuar me konceptin e spitaleve infektive që në të njëjtën kohë mund të ketë sëmundje që transmetohen nga njëri-tjetri, për këtë arsye katet janë krejtësisht të izoluara, me hyrje krejtësisht të veçanta.
Për këtë arsye, kati i parë i spitalit Infektiv është për momentin vetëm në dispozicion të të sëmurëve me COVID. Në katet e tjera ndodhen për momentin 4 pacientë të shtruar në total, nuk kanë asnjë lidhje, as personeli që shërben te kati i parë nuk ka lidhje me ta, e me shtimin e rasteve, të dyja katet e spitalit infektiv do të shndërrohen në një spital COVID”, tha ajo.
Zv.ministrja bëri të ditur se nëse do ketë prurje më të madhe, do shihet si opsion edhe vendosja e çadrave jashtë spitalit.
“Nëse do kemi një prurje më të madhe që këto dhoma nuk do ta përballojnë do shohim si opsion vendosjen e çadrave jashtë spitaleve. Sot është shtuar personeli, por qytetarët duhet të kenë parasysh që kur del e zënë, duhet të rrijë në linjë, se sistemi i urgjencës është i ndërruar me radhë, nëse mbyll telefonin dhe e provon më vonë, keni dalë nga radha. Nëse s’përgjigjet, vazhdoni të mbeteni në linjë”, deklaroi ajo.
Kujtojmë se numri i të prekurve nga koronavirusi në vend ka shkuar në 23.
