Shtohet bilanci negativ i personave që kanë humbur jetën nga koronavirusi në Itali. Pas viktimës së parë raportuar dje, një tjetër ka ndërruar jetë. Mediat italiane raportojnë se viktima e parë është Adriano Trevisan, babai i ish-kryetarit të Bashkisë, i cili prej 10 ditësh qëndroi nën kujdesin e mjekëve. Ndërsa viktima e dytë është një grua. Mësohet se në spital ndodhet i shtruar dhe një tjetër banor i të njëjtës zonë, që i përket bashkisë së Cinto Euganeo.
Lajmi është konfirmuar përmes një komunikate zyrtare nga guvernatori i rajonit, Luca Zaia. Ky i fundit pohoi se dy raste të reja me koronavirus janë zbuluar dje, të cilët ishin vendas dhe nuk kishin udhëtuar në Kinë, ndërsa bëhet fjalë për një 42-vjeçar dhe një 53-vjeçar. Në dy rajonet veriore, Lombardi dhe Veneto numri i të prekurve nga virusi vdekjeprurës ka arritur në 29.
Në shkallë globale, numri i viktimave nga virusi kinez ka shkuar 2360 dhe rreth 78 mijë persona janë konfirmuar të infektuar. Sipas të dhënave të fundit të lëshuara nga Komisioni Kombëtar i Shëndetit të Kinës (NHC), këtë të shtunë rreth 109 persona kanë ndërruar jetë në Kinë, tre prej të cilave në provincën Hubei, që është edhe epiqendra e shpërthimit të Covid-19.
