Ambasadori i BE-së në Tiranë, Luigi Soreca, duke folur nga Korça, i është përgjigjur interesimit nga ana e gazetarëve nëse BE-ja do bashkëpunojë me PD-në nëse Berisha zgjidhet kryetar. Soreca ka shprehur qëndrimin e tij, referuar debatit që po ndodh mes Bashës e Berishës.
Ambasadori Soreca u shpreh se Bashkimi Evropian bashkëpunon me të gjitha forcat politike, dhe do të vazhdojë të bëjë të njëjtën gjë. Soreca shtoi më tej se delegacioni i BE-së ka bashkëpunuar me PD-në edhe kur kjo e fundit kishte dalë nga Parlamenti, duke djegur mandatet.
A janë të gatshme vendet e Bashkimit Evropian, për të bashkëpunuar me një Parti Demokratike që në një të ardhme të afërt mund të drejtohet dhe nga z. Berisha?
“Ne bashkëpunojmë me të gjitha forcat politike. Vazhdimisht kemi bashkëpunuar me Partinë Demokratike edhe kur ishte jashtë Parlamentit. Ne do të ndjekim zhvillimet brenda partisë. Asgjë nuk do të ndryshojë. Do të punojnë me të gjitha forcat politike si zakonisht”, deklaroi ai.
Çdo ditë e më shumë po thellohen përplasjet mes kreu të Partisë Demokratike, Lulzim Basha dhe ish-kryeministrit Sali Berisha. Dje Basha e sulmoi ish-kryeministrin Berisha, ku në një konferencë për mediat shprehu bindjen se beteja e Berishës kundër tij është e humbur. Madje shefi i selisë blu theksoi se ka 95% mbështetjen e demokratëve, dhe për rrjedhojë nuk jep dorëheqjen nga PD-ja.
