Kryedemokrati Lulzim Basha ka qenë i pari që ka folur në protestën e opozitës së bashkuar, ku theksoi sërish se zgjedhje demokratike pa opozitën nuk ka.
Mes protestuesve ka pasur edhe agjërues të shumtë, të cilët kanë thyer agjërimin me ujë e hurma të thata, siç duket edhe nga fotot e shkrepura nga Tirana Today.
Edhe kryedemokrati Basha ka respektuar sakrificën e agjëruesve, e më pas kërkoi që një minutë të faleshin e luteshin për të ardhmen e Shqipërisë teksa tha:
“Më lejoni teksa vjen momenti i thyerjes së agjërimit, ju uroj nga zemra Zoti jua shpërbleftë sakrificën, Zoti e shndërroftë në bekim hyjnor për të gjithë shqiptarët dhe Shqipërinë sakrificën tuaj dhe ju ftoj të faleni e luteni bashkë me ta për një minutë për të ardhmen e vendit tonë”, tha Basha ndër të tjera.
Fjala e kreut të PD-së:
Mirë se keni ardhur në këtë bashkim historik, në këtë garanci kombëtare për fitoren tonë në betejën për Shqipërinë si gjithë Evropa.
Është mbushur ky shesh me kurajo, me vendosmëri. E duam Shqipërinë si gjithë Evropa, ky është mesazhi që japim në këtë bashkim të pashembullt, për herë të gjashtë.
Rama vodhi taksat e popullit më të varfër dhe ia dha një grushti oligarkësh, duke hequr bukën e gojës vogëlushëve tanë, erdhi me dhunë, me gazlotsjellës si një kriminel!
Rama ik! Ky mesazh buron kudo, ky është mesazhi i çlirimit të qeverisë nga krimi, është mesazhi i shkëputjes së Shqipërisë nga kthetrat e një grushti horrash që kanë marrë peng dinjitetin tonë, të ardhmen tonë, Rama ik!
Më lejoni teksa vjen momenti i thyerjes së agjërimit, ju uroj nga zemra Zoti jua shpërbleftë sakrificën, Zoti e shndërroftë në bekim hyjnor për të gjithë shqiptarët dhe Shqipërinë sakrificën tuaj dhe ju ftoj të faleni e luteni bashkë me ta për një minutë për të ardhmen e vendit tonë.
