Thellohen mosmarrëveshjet brenda Partisë Demokratike. Ashtu siç gazeta e deklaroi para disa ditësh se ish-kryeministri Sali Berisha është zhgënjyer me strategjinë e kryetarit të PD, Lulzim Basha, ditët e fundit përplasjet mes tyre kanë arritur kulmin.
Burime shumë të sigurta të gazetës, i pohuan gazetës se ish-kryeministri Berisha dhe kryedemokrati Basha kanë pasur përplasje sa i takon aksionit opozitar dhe sidomos distancimit nga protestat anti-qeveritare. Sipas burimeve, mësohet se ish-kryeministri i ka bërë thirrje kryedemokratit Basha që duke filluar nga muaji tjetër të nisë revoltat, pavarësisht gjendjes së jashtëzakonshme të vendosur nga qeveria.
Mësohet se Berisha e ka artikuluar këtë kërkesë në kushtet kur kryeministri Edi Rama nuk ka ndërmend të reflektojë dhe se për të gjendja e jashtëzakonshme duhet injoruar sa më parë. Në këtë kontekst, të njëjtët burime theksuan se ish-lideri demokrat ka kërkuar nga shefi i selisë blu që duke qenë se gjendja e jashtëzakonshme përfshin qarqe si Tirana, Durrësi dhe Lezha, ku për rrjedhojë ndalohen tubimet, këto të fundit të shtrihen në qytetet të tjera si Elbasani apo Shkodra dhe se ka ardhur koha që të rrëzohet qeveria, pasi rrugë tjetër nuk i ka mbetur opozitës. Madje, mësohet se Berisha i ka vënë afat Bashës që goditjen finale Ramës t’ia japin në 20 shkurt të vitit 2020, duke qenë se 30 vite më parë në të njëjtën datë u rrëzua regjimi komunist falë revoltave popullore. Ndërkohë, mësohet se Berisha i ka kërkuar Bashës që të mbështesë presidentin Meta në betejën me qeverinë.
Berisha thirrje për revolta
Por thirrjet për revolta dje ish-kryeministri Sali Berisha i ka artikuluar edhe publikisht. Përmes një statusi në rrjetet sociale, teksa komenton paketën “anti-shpifje”, ish-kryeministri Berisha kërkoi nisjen e revoltave popullore kundër kryeministrit Rama, pasi sipas tij, është armiku më i egër i shqiptarëve. Në këtë kontekst, Berisha theksoi se ka ardhur koha që të gjithë qytetarët të ngrihen në këmbë, në mënyrë që të përmbyset sa më parë qeveria. “Me këtë fushatë dhe këto qëndrime të fjalës së lirë ky bastard i bllokmenëve hoxhist, deklarohet pas Enver Hoxhës armiku më i egër i lirisë së shqiptarëve. Këto qëndrime janë një kushtrim për çdo shqiptar që i beson lirisë dhe vlerave të saj, në këmbë të bashkuar të flakim sa më parë kalbësirën që shfrytëzon dramat dhe tragjeditë kombëtare për t’ju konfiskuar lirinë shqiptareve”, deklaroi ai. Por këto thirrje janë presione dhe mesazh i qartë për kryedemokratin Basha, ç’ka tregon se mosmarrëveshjet mes liderit të PD dhe ish-liderit demokrat janë shtuar ndjeshëm.
Kreu i PD me axhendë të re në janar
Megjithatë, në kushtet kur presionet e Berishës janë shtuar ndjeshëm ndaj tij, kryedemokrati Lulzim Basha është vënë në lëvizje. Gazeta ka mësuar se kreu i Partisë Demokratike ka njoftuar vartësit e tij në rrethe se nga muaji tjetër do të vijojë me aksionin opozitar, por me një strategji të re. Mësohet se në kushtet kur qeveria ka shtyrë gjendjen e jashtëzakonshme deri në 30 mars të vitit që vjen, Basha është shprehur se do ta nisë aksionin opozitar atje ku e la, ndërsa do të përdorë një strategji të re kundër qeverisë, duke mos dhënë më shumë detaje. Mirëpo, kjo strategji, e cila pritet të aplikohet nga Basha vitin që vjen, është në një farë mënyrë edhe sfidë për presidentin Ilir Meta. Ky i fundit mësohet se do të zhvillojë tubimet në muajt e ardhshëm në disa qytete të ndryshme të vendit, ku në fokus do të jetë rikthimi i referendumeve dhe mbrojtjes së demokracisë. Kështu që, duke qenë se me nisjen e tubimeve Meta kërkon të marrë frenat e opozitës, Basha është hedhur në sulm për t’i prishur planet kreu të shtetit. Pra, përmes fillimit të aksionit opozitar, atje ku e la, Basha kërkon që t’i tregojë Metës se është ai kreu i opozitës dhe jo Meta. /Gazeta SOT
