Ish-kryeministri Berisha është treguar mjaft i drejtëpërdrejtë, e madje nuk është kursyer ndaj akuzave të ambasadores amerikane Yuri Kim. Në një konferencë për mediat, Berisha tha se ambasadorja Kim nuk mund të vendosë se kush duhet të qëndrojë dhe kush jo në Parlamentin shqiptar, ndërsa u shpreh se diktatura dhe bari janë një binom i pandarë, duke iu përgjigjur në këtë mënyrë deklaratës së Yuri Kim se “do të ishte tragjike nëse PD do të hante bar për hir të Berishës”.
Ai lëshoi një lum akuzash ndaj ambasadores, duke e cilësuar si unike në botë, pasi ka lavdëruar një masakër zgjedhore.
“Ambasadorja Kim është unike në botë, si ambasadore që pasi ka lavdëruar një masakër zgjedhore kërkon t’i diktojë këtij vendi se kush duhet dhe nuk duhet të futet në Parlament. Diktati dhe bari janë binom i pandarë. Shqiptarët kanë ngrënë barë dhe kanë vdekur nga bari, kanë ngrënë mish të ngordhur dhe kanë vdekur. Kjo ka ndodhur dikur edhe në Kore.
Diktatura dhe bari janë të lidhura, ajo çfarë unë po bëj është që shqiptarët të mos hanë bar dhe rruga e vetme që shqiptarët të mos hanë bar është transparenca. Dua të them së nuk mbrohet Sali Berisha nga sovraniteti, por Sali Berisha nuk pranon që nën ditkat t’i shkelë ato dhe ky është ndryshimi. Rruga e vetme për t’i mbrojtur është transparenca.
E them edhe njëherë se nuk ka forcë në botë përveç të gjithëfuqishmit, që mund të më pengojë mua për të ushtruar funksionin tim të zgjedhur nga qytetarët. Ata që nuk bëjnë transparencë dhe u ofrojnë barin shqiptarëve kanë frikë nga e vërteta. Unë kam deklaruar se nëse paraqitet një fakt, unë marr vendimet e mia.
Por duhet ta dini që nuk ka forcë në botë që të më imponojë mua përveç transparencën, një qëndrim tjetër përveç këtij që kam shpallur. Cilido që akuzon pa fakte bazë ka probleme madhore ma karakterin e tij. Basha gjatë gjithë takimit ka faktuar fakte, prova, dokumente”, tha Berisha.
Berisha u shpall i padëshirueshëm dhe iu ndalua të hyjë në SHBA bashkë me familjarët e tij në maj. Regjimi komunist në Shqipëri i mësoi shqiptarëve se ata duhej të ishin gati të hanin edhe thjesht bar, me qëllim që Partia e Punës të ruante pushtetin e saj. Shprehja ishte: “Populli shqiptar han bar dhe dorën nuk ia shtrin armikut”! Kjo shprehje ka marrë një tjetër ngjyrim, teksa ambasadorja amerikane sugjeronte që Partia Demokratike, forca e parë anti-komuniste në vend, “të mos hajë bar” për interesat e një njeriu të vetëm, pra Berishës.
“Partia Demokratike ka luajtur një rol të pazëvendësueshëm, për ta nxjerrë këtë vend nga komunizmi, për ta çliruar nga diktatura,” deklaroi ambasadorja pasi u takua me udhëheqësin e demokratëve Lulzim Basha, ndërsa Partia Demokratike gjendet nën dilemën nëse duhet të ndjekë politikën konvencionale parlamentare apo të rifillojë politikën e tensionimit dhe konfliktit në rrugë.
“Do të ishte një ironi historike, por edhe një tragjedi për vendin, jo vetëm për partinë, nëse partia do të hante bar për hir të interesave personale të një njeriu”, ka thënë më herët Yuri Kim. /Tirana Today
