Ish-kryeministri Berisha nuk është ndalur me protestën e 8 janarit, të cilën e konsideroi paqësore, por ka ftuar demokratët e Shkodrës që t’i bashkohen të dielën në Pallatin e Sportit në orën 11:00. Në komunikimin me gazetarët, ai u shpreh i bindur se në seli ka patur njerëz të armatosur dhe se i kanë fotografuar. Berisha i mëshon fort faktit se protesta e 8 janarit ishte më paqësorja në historinë e vendit. Ai paralajmëron se selia do u kthehet demokratëve.
“Pretendimet e mia janë të vërteta. Askush nuk kundërshton dot vendosjen e blindave në kundërshtim me çdo parim.
Askush nuk më kundërshton dot. Aty e patë kur u hodh tymi së pari, më pas u hodh pluhuri toksik, bomba shurdhuese dhe pamja më simbolike e dy botëve, një njeri idealist me flamurin e PD për ta vendosur në ballkon dhe një grup primitiv i çajnë kokën. I patë ju këto skena. Aty flitet me fakte.
Që të gjithë i ka larguar Lul Brava me mjetin e tij. Kam prova të padiskutueshme që aty ka pasur njerëz të armatosur. Njerëz që i kanë fotografuar. E patë fotografinë që doli pas protestës, aty kishte njerëz të armatosur.
Gjykata zbatoi urdhrin e Ramës. Përkrahësit e mi ishin njerëz idealistë. Kjo ishte protesta më paqësore në historinë e vendit. Nuk u gërvisht asnjë njeri nga pala tjetër dhe u plagosën 12 protestues paqësore dhe qindra u helmuan me gaz.
Unë tani ftoj demokratët e Shkodrës ditën e dielë në orën 11 në Pallatin e Sportit. Selia do i rikthehet PD. Statuti i votuar nga delegatët në 11 dhjetor ka një nen që sanksionon se selia është ajo ndërtesë që sot Lul brava e ka shndërruar në çerdhe krimi.
Selia do u kthehet demokratëve, nuk ka forcë në botë që të marrë selinë dhe ta shndërrojë në kulla”, tha më tej Berisha.
