Kryeministri Edi Rama ka reaguar për herë të parë lidhur me shpalljen ‘non grata’ të Berishës. Teksa ka qenë i ftuar mbrëmjen e djeshme në emisionin ‘Open’, ai tha se për shkak të detyrës, di shumë gjëra. Për këtë arsye ishte në dijeni edhe për ndalimin e udhëtimeve në SHBA të Sali Berishës.
‘Për shkak të detyrës, unë di edhe gjëra të tjera’, tha Rama.
Ishte viti 2019, ku kreu i qeverisë Edi Rama deklaronte nga foltorja e Kuvendit se Sali Berisha nuk e kalonte dot oqeanin për të shkuar në Shtetet e Bashkuara të Amerikës. Kjo u faktua, ku ish-kryeministri Sali Berisha u shpall ‘non grata’ nga DASH, për shkak të korrupsionit.
Rama shtoi më tej se shpallja ‘non grata’ e Berishës, erdhi direkt nga SHBA dhe jo nga ndonjë lobim i mundshëm.
‘S’kam asnjë koment për shpalljen e tij non-grata, çdo koment e politizon këtu brenda. Ndërkohë që kjo nuk është politikë e brendshme, sikur SHBA dhe DASH të funksiononin me lobime, imagjinoni sa diktatorë me arka me flori e diamantë mund ta kishin blerë Amerikën.
Ata mund të blejnë, por nuk blihen. Lobimi atje janë ca fotografi me kongresmenë, disa prej tyre nuk e kanë haberin kush është Shqipëria, ndonjë artikull këtu e atje…nëpërmjet të gjithë miliarderëve. Nuk funksionon kështu, sepse po të ishte ashtu do të ishin si ne, si gjithë të tjerët. Nuk ndodh, është një përrallë që ua tregon atyre që e besojnë, duke përfituar nga padija, injoranca. Nuk ndodh’, u shpreh Rama.
