Balla ka ironizuar zgjedhjen e Sali Berishës në krye të PD-së. Nga foltorja e Kuvendit, kreu i Grupit Parlamentar të Partisë Socialiste, Taulant Balla, tha se dje PD-ja shënoi fitoren historike kundër amerikanëve. Po sipas tij, dje kishte 3 gara, Manchester City me Liverpool, Milani me Interin dhe Berisha me Elezin. Ish-kryeministri Sali Berisha është zgjedhur kryetar i Partisë Demokratike, 9 vite pasi u largua nga kjo detyrë. Ai mori shumicën e votave në të gjitha degët ku u votua sipas parimit “Një anëtar, një votë” përballë rivalit Ibsen Elezi. “Në qershor do kemi më shumë diskutime për këtë çështje, pasi në qershor e presim mbajtjen e Konferencës së parë Ndërqeveritare. Franca po bën përgatitjet që kjo konferencë të mbahet. Dua që ta them shumë qartë, që Shqipëria nuk mund të jetë dëmi kolateral i një çështje ku Shqipëria nuk është pjesë fare. Në debatin mes Bullgarisë dhe Maqedonisë së Veriut, Shqipëria nuk mund të merret peng. Pas 4 vitesh ku në të gjitha raportet europiane, Shqipëria ka përmbushur kushtet dhe kriteret, vendi ynë ka të drejtë që në këtë rrugë të mos merret peng.
Dhe përsa kohë në metodologjinë e re të integrimit europian, që çdo vend do vlerësohet sipas performancës së vetë. Të dashur kolegë, sot jemi disa ditë larg që nga miratimi i rezolutës për Shqipërinë nga Parlamenti Europian.
Kurrë më parë nuk ka pasur një unanimitet, 519 anëtarë nga grupet kryesore politike. Dhe pastaj vijnë këta që thonë se Shqipëria po ndryshon kurs. Ka vetëm një plan A, jo plan B. Plan B keni ju që e keni kthyer antiamerikanizmin në doktrinë. Për këtë, ne nuk ju shërojmë dot. Bashkohuni në një trup të vetëm, dhe me fitoren më të madhe kundër Amerikës. Tre gara kishte dje, City me Liverpoolin, Milani me Interin dhe Saliu me Ibsenin”, tha Balla.