Ish-kryeministri Sali Berisha ka deklaruar sot se të gjitha sondazhet e nxjerrin opozitën shumicë dërrmuese. “Opozita në të gjitha pollet e fundit del shumicë dërrmuese. Ky fakt dëshmon që ajo mund të ndodhë, por që Rama zgjedhje nuk bën kjo është e sigurtë. A mundet Rama? Mision jashtëzakonisht i vështirë, pasi do të përdorë të gjithë shtetin për të manipuluar rezultatin, ndaj dhe është sot rreziku më i madh në Europë për votën e lirë”, u shpreh ish-kryeministri.
I pyetur nga gazetari Çim Peka në ‘Syri TV’, nëse pranojnë të futen në zgjedhje me Ramën, Berisha deklaroi se një gjë e tillë nuk do të ndodhë. Ai tha se kryeministri Rama do të largohet me bisht ndër shalë, dhe se vala e protestave gjigande do e detyrojnë që të kërkojë azil politik.
“Nuk do të ndodhë. Rama do të largohet me bisht ndër shalë. Vala tjetër e protestave gjigande, sipas mendimit tim, do ta detyrojnë të kërkojë azil politik”, u shpreh Berisha.
