Asnjë nga tre deputetët e Partisë Demokratike të Qarkut të Dibrës, nuk ka qenë i pranishëm dje në “Foltoren” e ish-liderit demokrat. Deputetët Xhelal Mziu, Dhurata Çupi dhe Kreshnik Çollaku braktisën “Foltoren” e Berishës dje në qytetin e Peshkopisë, duke u pozicionuar kështu në krah të kryedemokratit Lulzim Basha.
Ai ka shfrytëzuar “Foltoren”, për të dërguar një sërë mesazhesh kërcënuese për kryeministrin Edi Rama, dhe kryedemokratin Lulzim Basha, ndërkohë që paralajmëroi edhe protesta të fuqishme dhe madje një ‘97 të dytë.
Duke folur para simpatizantëve të mbledhur në Pallatin e Kulturës në Peshkopi, Berisha falenderoi të gjithë demokratët që i qëndruan besnikë edhe në vitin e mbrapshtë ’97, ndërsa bëri thirrje për revolta, duke lënë të nënkuptohet si në grushtin e shtetit të vitit ’98 të provokuara nga ai kundër qeverisë “Nano”.
“Ndaj le të bashkohemi ne me të gjithë ata që kanë themeluar këtë parti, me ata që kanë vënë themelet e kësaj qeverisje, kësaj epoke, me të gjithë ata që në vitin 1997 qëndruan ndaj rebelimit komunist dhe bënë që të fitojmë në vitin 2005, me të gjithë ata që këto 8 vite derdhën lumenj djerse, por që nuk patën fatin të kenë një udhëheqje. Me të tjerë që duan të bashkohen dhe të ngrihemi në këmbë dhe të bëhemi gati për një përballje të fuqishme me Edi Ramën”, deklaroi ai.
Po ashtu, ish-kryeministri Sali Berisha paralajmëroi kryeministrin Edi Rama, se daullet që ranë dje në Peshkopi, janë për betejë për të gjitha gjërat që ka bërë. “Edvin Rama po të them dhe paralajmëroj sot nga Peshkopia se ato daulle që bien jashtë nuk janë dasme, por beteje dhe vetëm beteje. Do përballesh me demokratët për të gjitha këto që ke bërë”, u shpreh ai.
