Kreu i PD-së, Sali Berisha ka dhënë një deklaratë të fortë në emisionin “Drejt” në RTV Ora, ku tha se kryeministri Edi Rama i ka kërkuar 10 mln euro ryshfet Ylli Ndroqit. Ai tha se Rama e ka bërë me telefon këtë kërkesë, për të cilën Berisha theksoi se është në dijeni, dhe Ylli Ndroqi e ka rrëzuar këtë kërkesë. Sipas Berishës, me gjasë këtu ka nisur përplasja mes Ramës dhe Ylli Ndroqit.
“Në marrëdhëniet e pronarit të këtij televizioni dhe Edi Ramës, di këtë: Rama në telefonatë për një biznes ka pretenduar për ryshfet 10 milionë euro dhe pronari i është përgjigjur se nuk ndodh.
I kam bërë thirrje Ndroqit që ta bëjë publike këtë. Unë jam informuar për këtë pothuajse në kohë reale, 1 ose 2 ditë pas ngjarjes. Dhe unë kam shumë dyshime se këtu ka filluar dhe sherri.
Më janë thënë edhe pasazhe të tjera të kësaj bisede. Ai që erdhi dhe ma tha këtë, ai e konsideronte fatkeqësi të madhe që kryeministri pretendonte shumë të mëdha. Ai ka shndërruar në titull ekzekutiv vendimin e gjykatës së shkallës së parë. Në çdo vend ka sistem me 3 shkallë, ndërsa ky ka vetëm vendim të shkallës së parë”.
Gjykata e Posaçme mori vendimin për konfiskimin e pasurive të presidentit të Yldon Media Group Ylli Ndroqi duke mbyllur dhe RTV Ora.
“Një vendim me prapavijë qartazi politike”, e quajtën avokatët në një prononcim për median pasi mbaroi seanca në Gjykatën e Posaçme.
A ka prapavijë politike?
Avokati Besnik Muçi: Sa kohë që është një vendim haptazi në kundërshtim me ligjin, nuk ka arsye tjetër veç prapavijës politike. Qëllimi është mbyllja e një media në Shqipëri që nuk pëlqehet nga politika. Kjo është arsyeja sa kohë që nuk gjejmë asnjë arsye që ky vendim të jetë mbështetur në ligj.
Avokati Enis Daci tha se beteja do të vijojë në Strasburg.
Avokati Enis Daci: “Një betejë u humb sot. Ishte betejë fatkeqësisht e paracaktuar, diktuar dhe orkestruar. Beteja tjetër do të jetë në Strasburg. Do të shohim çfarë do të thotë Gjykata Ndërkombëtare për vendimin e sotëm”.
