Bashkimi Evropian ka përshëndetur marrëveshjen për targat, që është arritur ndërmjet Kosovës dhe Serbisë në Bruksel.
Me anë të një njoftimi të BE-së, thuhet se ata i nxisin palët e Prishtinës dhe Beogradit që të angazhohen në mënyrë konstruktive në dialog, në mënyrë që të bëjnë përparim të shpejtë në normalizimin gjithëpërfshirës të marrëdhënieve të tyre.
“BE-ja e mirëpret rezultatin e diskutimit të sotëm, dhe i nxit të dyja palët që të angazhohen në mënyrë konstruktive në dialog, në mënyrë që të bëjnë përparim të shpejtë në normalizimin gjithëpërfshirës të marrëdhënieve të tyre”, thuhet në njoftim.
Kurti: Ka nisur epoka kur Serbia të mësohet me reciprocitet
Kryeministri i Kosovës, Albin Kurti shkruan në një postim në rrjetet sociale, se me marrëveshjen e arritur, Serbia do të nisë “të mësohet me reciprocitet”. Sipas tij, me heqjen e barrikadave, nuk do të ketë më nevojë që njësitë speciale të Policisë së Kosovës të qëndrojnë në Jarinjë dhe Bërnjak. Por, policia do të jetë gjithnjë e gatshme për ndërhyrje në çfarëdo cenimi.
“Reciprociteti i targave të automjeteve është vendosur. Meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë pa dallim do t’iu mbulohet po ashtu simboli i tyre në territorin e shtetit tonë. Njësia Speciale e Policisë së Kosovës ka shkuar në Jarinje dhe Bërnjak më 20 shtator për të mbrojtur vendkalimet dhe policinë kufitare nga bllokuesit e rrugëve dhe qarkullimit të lirë. Meqë ata do të largohen, njësia jonë speciale nuk ka pse qëndron atje, dhe mbetet gjithnjë e gatshme për ndërhyrje në çfarëdo cenimi të njëjtë apo të ngjashëm në të ardhmen. Natyrisht, policia jonë kufitare në vijim do të zbatojë reciprocitetin e targave. KFOR-i do të qëndrojë aty, rreth dy javë, që gjithçka të jetë e sigurt.
Në javën e shkuar, Presidenti i Serbisë vuri katër kushte për takimin në Bruksel të përfaqësuesve tanë. Natyrisht që nuk ju plotësuan ato dhe dje u zhvilluan bisedimet në Bruksel. Tash fillon epoka kur Serbia nis e mësohet me reciprocitet.
