Seanca plenare në Kuvendin e Kosovës e cila do mbahej sot në orën 10:00, është shtyrë për datë tjetër. Në një deklaratë të shpërndarë nga Kuvendi, njoftohet se me kërkesë të propozuesit të rezolutës dhe me marrëveshje të grupeve parlamentare, është shtyrë vijimi i seancës plenare të Kuvendit.
“Për kohën e mbajtjes së saj, do të vendosë Kryesia e Kuvendit”, thuhet në njoftim.
Në seancën e mbajtur të martën, debat i cili zgjati deri në orët e vona, u ndërpre edhe debati për dialogun. Interpelanca e kryeministrit Avdullah Hoti për heqjen e masave të reciprocitetit dhe dialogu me Serbinë, sollën shumë përplasje mes deputetëve.
Në seancë nuk mori përkrahje as rezoluta e propozuar nga Vetëvendosja për rikthim të masës së reciprocitetit.
Uashingtoni e mori në dorë situatën, dhe më 27 qershor synohej që të mbyllej pakti, por duket se dje ka ndodhur një zhvillim mjaft i fortë duke lëkundur dialogun.
Zyra e Prokurorit të Specializuar në Hagë, ka njoftuar se ka ngritur akt-akuza ndaj presidentit Hashim Thaçi, kreut të PDK, Kadri Veseli dhe disa zyrtarëve të tjerë, për krime lufte.
Sakaq, sot kreu i Lidhjes Demokratike të Kosovës, Isa Mustafa, ka reaguar për anulimin vizitës së delegacionit kosovar për në Washington. Mustafa është shprehur se Kosova për në Washington u nis me vullnetin më të mirë, por u nda përgjysmë sa ishte në aeroplan.
