Një ditë më parë, gazetarët dolën në protestë pas vendimit të Kuvendit për t’i lënë jashtë komisioneve dhe seancave plenare. Ata e cilësuan këtë vendim të Byrosë së Kuvendit, si një tentativë për të censuruar punën e tyre. Në vendimin e marrë nga Byroja e Kuvendit pak ditë më parë, thuhet se prania e kamerave të shumta në korridore dhe në komisionet parlamentare, krijonte vështirësi për menaxhimin dhe mbarëvajtjen e mbledhjes për shkak të ambienteve shumë të vogla të sallave ku zhvillohen mbledhjet.
“Sipas disa ndryshimeve në Rregulloren e Kuvendit, të miratuara në Byronë e këtij institucioni, gazetarët do t’i ndjekin aktivitetet vetëm nëpërmjet rrjetit të transmetimit në një sallë të posaçme për gazetarët”.
Pas protestës së gazetarëve dhe kritikave të BE, Kuvendi ka thirrur gazetarët ditën e nesërme në një takim, për të diskutuar rreth vendimit për t’i lënë jashtë Komisioneve dhe seancave plenare. “Në përgjigje të shqetësimeve tuaja për sistemin e ri Audio-Video të instaluar në Kuvend, shqetësime të ngritura edhe në letrën drejtuar Kryetarit të Kuvendit, z. Gramoz Ruçi, nga Unioni i Gazetarëve Shqiptarë, ju ftojmë në një takim me Sekretarin e Përgjithshëm të Kuvendit, z. Genci Gjonçaj, nesër, ditën e premte, në orën 11:00, në sallen në katin e katërt të Kryesisë së Kuvendit”, thuhet në njoftimin e Kuvendit.
