Agjencia e lajmeve “Reuters” raporton se “Bashkimi Europian do të nisë negociatat për anëtarësimin e Shqipërisë dhe Maqedonisë së Veriut”.
Kujtojmë se shpresat e Shqipërisë dhe Maqedonisë së Veriut për t’u anëtarësuar në BE janë thyer disa herë vitet e fundit për shkak të skepticizmit të Francës dhe Holandës.
Mirëpo Parisi zyrtar dhe Haga kanë lehtësuar në javët e fundit kundërshtimet e tyre.
Greqia ende nuk i është bashkuar vendimit të vendeve të bllokut, i cili kërkon unanimitetin e të gjithë anëtarëve, por burime diplomatike bëjnë me dije se Athina zyrtare e ka dhënë miratimin e saj pasi në draft u përfshinë dhe kërkesat për minoritetin në Shqipëri, shkruan “opinion.al”.
Nëse asnjë vend nuk ka kundërshti, vendimi pritet të miratohet në mesin e javës.
