Vijon fenomeni i grabitjes së bagëtive në njësinë administrative Levan në Fier.
Banorët e Bishanit, Poros, Pishës dhe Martines janë shprehur të shqetësuar, pasi për ta bagëtitë konsiderohen si e vetmja mundësi për të mbijetuar në këtë zonë.
Ata shprehen se autorët arrestohen dhe më pas lihen të lirë.
Në ndihmë të banorëve u ka ardhur edhe kreu i Partisë Demokratike në Fier, Luan Baçi i cili i bën thirrje policisë që mos të merren me tymueset dhe kapsollat që hedhin protestuesit në tubimet e opozitës së bashkuar, por t’i kushtojnë rëndësi rasteve të tilla. Ndërsa nuk përjashton mundësinë e një bashkëpunimi mes efektivëve të policisë dhe hajdutëve.
“Thirrje ministrit, drejtorit të përgjithshëm të policisë, drejtorit të policisë Fier, të mos merren me tymuese ndaj protestuesve por të zbulojnë grupet e hajdutëve. Mund të ketë bashkëpunim me grupet e hajdutëve nga punonjës të ndryshëm policie”, deklaroi Baçi.
