Kryetari i PD-së, Lulzim Basha i është përgjigjur ‘flakë për flakë’ lidhur me maskat e skaduara. Duke ia kthyer më të njëjtën monedhë, kryedemokrati Basha shkruan në Twitter se kryeministri duhet të japë llogari pse ka shpërndarë 1.2 milionë maska të skaduara. Basha i ka kërkuar Ramës që të bëjë detyrën, dhe të marrë masat reale kundër epidemisë, për të mbrojtur qytetarët.
“Në vend që të sulmojë opozitën @ediramaal duhet të japë llogari pse ka shpërndarë 1.2 milionë maska të skaduara? Gënjeshtrat dhe sulmet kundër opozitës nuk i shërbejnë as sigurisë dhe as jetës së shqiptarëve! Janë mijëra burra, gra dhe femijë që duhen mbrojtur.
Boll me justifikime që fshehin dështimin, boll me gënjeshtra që fshehin paaftësinë, bëj detyrën dhe merr masa reale kundër epidemisë, për hir të gjithë shqiptarëve”.
Pak më herët, kryeministri Edi Rama reagoi për denoncimin e PD, se mjekët që shërbejnë për të prekurit nga koronavirusi, po përdorin maska të skaduara.
“Janë ndaluar në doganën e Durrësit. Ishin të destinuara për një shoqatë bamirësie, e cila pas thirrjeve të përsëritura të autoriteteve, nuk u paraqit për të paguar detyrimet e shtetit dhe për të tërhequr këto pako që janë prodhim amerikan. Nëse këto maska do të ishin të rrezikshme dhe skadenca e tyre do të implikonte gjësendi përveç uljes së eficencës në salla kirurgjikale ku operohen njerëz, nuk do të dilnin nga kufijtë e Kanadasë e as të SHBA për të kaluar oqeanin për të ardhur në Shqipëri”, tha kryeministri.
