Kryetari i PD-së, Lulzim Basha akuzon kryeministrin Rama si problemin më të madh për ekonominë, papunësinë dhe shkatërrimin e drejtësisë në Shqipëri.
Në takimin me demokratët e Lezhës, Basha komentoi edhe vendimin e Gjykatës së Durrësit për t’ia dorëzuar mandatin Valbona Sakos. Sipas tij, ky vendim ka ndryshuar në mënyrë të paprecedentë, me kërkesën e dyshes Rama-Dako.
“Kjo tregon se drejtësia është tërësisht e privatizuar nga Edi Rama. 3 vjet pas miratimit të reformës në drejtësi, drejtësia është tërësisht e kapur nga Rama. Kjo është arsyeja pse drejtësia nuk funksionon. Edi Rama është kryeministri më hajdut, më arrogant, dhe më mashtrues më historinë e Shqipërisë. Paratë tuaja, paratë e shqiptarëve po i vjedh Edi Rama me familjen dhe miqtë e tij. Pasurohen të pushtetshmit dhe të pasurit, varfërohen njerëzit e thjeshtë dhe të pambrojtur. Nëse shqiptarët nuk kanë të hanë është sepse paratë e tyre i ka vjedhur Edi Rama. Miliarda euro janë vjedhur, abuzuar dhe shpërdoruar këto 6 vjet, të gjitha kanë përfunduar në xhepat e Ramës dhe janë shpërdoruar për tekat e Ramës në luks dhe fasada”, tha Basha.
Kryeopozitari në fjalën e tij, ka folur edhe në lidhje me miratimin e aksit rrugor ‘Milot-Balldren’ nga qeveria ditën e djeshme.
“Nëse shqiptarët janë pa punë, është sepse ekonominë, paratë dhe mundësitë ekonomike i kanë marrë oligarkët dhe klientët e Ramës. Nëse shqiptarët nuk kanë shpresa është sepse shpresat e tyre i ka vrarë Rama me oligarkët hajdutë, siç po bën edhe këtu në Lezhë me kusarinë Milot Balldren. Edi Rama është artist i mashtrimit. Çdo gjë që ka premtuar, çdo gjë që ka thënë, ka qenë mashtrim me qëllim për të vjedhur. Çdo projekt, program dhe politikë është mashtrim për shqiptarët në shërbim të oligarkëve”, u shpreh ai.
