Kreu i PD-së, Lulzim Basha, teksa ka zbatuar vendimin e qeverisë për mbajtjen e maskës, tha në një konferencë për shtyp nga selia blu se situata po rëndohet çdo ditë, për shkak të shpërfilljes. Ai ngriti edhe një herë shqetësimin mbi shëndetësinë, dhe pamundësinë e qytetarëve për të blerë ilaçe.
“Spitalet janë kthyer në vatra infeksioni. Shifrat që qeveria jep, janë në rastin më të mirë kundërthënëse. Shikoni vetëm shpalljen e kapaciteteve të spitaleve. Sa shtretër thonë që kanë në dispozicion. Këta kanë gënjyer 6 muaj për pandeminë”, u shpreh Basha.
Më tej, ai tha se tani është koha që lekët e taksapaguesve shqiptarë t’ju kthehen atyre për emergjencën ekonomike dhe jo të shkojnë të inceneratorët. “Ju sigurioj se herët a vonë, fatura nga vjedhja me inceneratorët do të jetë dyfish më e lartë për atë, për vetë faktin se nuk e ndali edhe kur njerëzit kishin nevojë. Tani është momenti që lekët e shqiptarëve të shkojnë te nevojat dhe emergjencat ekonomike. Edhe në Zimbabve ministrin e inceneratorëve e futën në burg”, deklaroi kreu i PD.
Basha ka i ka bërë thirrje qeverisë që të zbatojë planin me 5 pika të Partisë Demokratike. “U shpreh ngushëllimet e mia të gjithë familjeve të viktimave të COVID-19! Shpreh solidaritetin dhe përkrahjen e plotë për familjet e të sëmurëve që trajtohen në spitale apo në shtëpitë e tyre. Plani me 5 pika, përballje me aspektin shëndetësor ekonomik dhe social të pandemisë. Plani me 5 pika, jo përpjekje për kredi politike, por adoptim i praktikave më të mira të rajonit”, tha Basha.
