Kreu i demokratëve, Lulzim Basha është shprehur se nuk duhet të ketë asnjë minutë paqe për kryeministrin Rama derisa të largohet e t’i hapë rrugë zgjedhjeve të lira.
Gjatë mbledhjes së Kryesisë së PD-së, Basha theksoi se kreu i qeverisë dhe njerëzit e tij më të afërt e kanë vendin në burg, ndërsa shton se PD nuk do të lejojë një krim elektoral si ai i vitit 2017.
“Koha kur në Shqipëri Edi Rama dhe kriminelët e tij diktonin zgjedhjet, ka marrë fund njëherë e mirë. Ne do të jemi në krye të protestave të qytetarëve, derisa të fitojmë betejën europiane dhe demokratike për të mos lejuar krimin elektoral të 30 Qershorit. Edi Rama e di se nuk mund t’i rezistojë presionit popullor, prandaj po kërcënon me burg.
Edi Rama ka frikë, sepse e di shumë mirë, që një hetim i pavarur, çon në burg atë vetë, Vangjushin e tij dhe Damian Gjiknurin për blerjen e zgjedhjeve bashkë me krimin. Mesazhi i qëndresës qytetare për Edi Ramën, që iu frikësohet zgjedhjeve të lira si djalli nga temjani, është se nuk ka shpëtim prej tyre.
Ne jemi të gatshëm të sakrifikojmë çdo gjë për të mos lejuar që në 30 qershor të ketë një krim tjetër elektoral si ai i 2017-ës”, deklaroi Basha.
