Kreu i Partisë Demokratike, Lulzim Basha ditën e sotme zhvilloi një takim me qytetarët e Rrogozhinës, të cilët i ftoi të marrin pjesë në protestën e 13 prillit.
Më tej, Basha premtoi se do të rrisë pensionet kur PD të vijë në pushtet. Sipas tij, nuk do të ketë më pension nën 250 mijë lekë të vjetra në muaj.
“Bashkohuni me ne, bashkohuni me këtë shumicë, bashkohuni me shumicën dërrmuese të shqiptarëve, se sot jemi shumicë morale dhe politike. Prandaj, rritja e pensioneve do të fillojë menjëherë. Pensione nën 250 mijë lekë në muaj në krye të 4 vjetëve nuk do të ketë”, deklaroi Basha.
Basha mori si shembull prindërit e tij, duke thënë se edhe pse kanë punuar gjithë jetën, pensioni nuk u mjafton as për ilaçe.
“Unë nisem nga prindërit e mi, të cilët kanë punuar gjithë jetën dhe po të mos kenë ndihmë nga unë, pensioni s’u mjafton as për ilaçet dhe energjinë elektrike. Gjithë jetën nëna ime mësuese, hiq faturën e ilaçeve, s’u ngelet as 5 mijë lekë në ditë për muajin. Po jua them se e di fare mirë këtë situatë. Dhe të mendosh se prindërit e mi nuk kanë pensione të ulëta. Po ata që marrin vetëm 70, 80 apo 90 mijë lekë pension, me çfarë jetojnë? E çan kokën ky (Rama) me çfarë jetojnë ata? Ky një shishe verë e blen sa dy pensione”, u shpreh Basha.
