Basha ka ripërsëritur akuzat për qeverinë, se po fsheh numrat e të infektuarve me COVID-19. Për shifrat e larta të rasteve ditore, Basha bën fajtor kryeministrin Edi Rama dhe ministren Manastirliu. Kryetari i Partisë Demokratike, Lulzim Basha, në një bashkëbisedim me gazetarët, tha se paratë po i kalojnë përfituesve të inceneratorëve, ndërsa shqiptarëve nuk iu bëhet tamponi.
“Mungesa e kapaciteteve testuese, të infektuarit duhet të presin deri në 6 ditë për të bërë testin. Statistikat zyrtare të viktimave të COVID, fshehin shifrat e vërteta.
Vetëm dje, nga thesari i janë dhënë 565 mijë euro mafias së plehrave. Kjo shumë parash është baraz me 14 mijë tamponë.
Kur u thuhet e vërteta, fshihen pas sakrificës së mjekëve për të mos u përballur me të vërtetën.
Rama dhe Manastirliu po fshihen pas sakrificës së mjekëve. Kështu, numri i të infektuarve mbahet artificialisht i ulët, dhe përmasa e sëmundjes mbahet e fshehtë.
Numri i lartë i infeksioneve dhe viktimave është pasojë e dështimit të qëllimshëm të Ramës”, tha Basha.
