Kreu i PD-së, Lulzim Basha, ka shpërndarë sot një video në rrjetin social Facebook, ku shprehet se Rama përbën kërcënim për shqiptarët. Basha shton se Agim Kajmaku ka falsifikuar formularin e dekriminalizimit, dhe se ka probleme të hapura me drejtësinë greke. Kryedemokrati shkruan ndër të tjera se për sa kohë Rama është në zyrën e kryeministrit, nuk do të ketë as drejtësi, dhe as demokraci.
Statusi
“Edi Rama është kërcënim dhe rrezik për jetën dhe sigurinë e çdo familje shqiptare! Ai ka kapur dhunshëm çdo pushtet me ndihmën e një bandë kriminelësh e hajdutësh me të cilët vjedh Shqipërinë.
Njëlloj si me Valdrin Pjetrin, Edi Rama e di se Agim Kajmaku i Vorës ka falsifikuar formularin e dekriminalizimit! Hajduti Psiqik e di se i përzgjedhuri i tij për Vorën ka probleme të hapura me drejtësinë greke, dhe se ai e ka fshehur të vërtetën.
Por Edi Rama, përmes Belinda Ballukut, vendosi veton dhe injoroi kërkesën e socialistëve të Vorës para 30 Qershorit që të mos kandidonte një person për të cilin e gjithë Vora e di se ka probleme të hapura me drejtësinë greke.
Jorgo Kajmaku duhet të largohet dhe të merret menjëherë i pandehur sepse ka shkelur Ligjin e Dekriminalizimit dhe ka fshehur të dhënat mbi të kaluarën e tij. Ai duhet të përballet edhe me drejtësinë greke të cilës i është fshehur prej vitesh! Por sërish Edi Rama e mbron Jorgo Kajmakun nga zbatimi i Ligjit të Dekriminalizimit, me anë të prokurorisë së korruptuar dhe politizuar.
Por sa kohë Edi Rama është në zyrën e kryeministrit, nuk do të ketë as drejtësi dhe as demokraci, banditët, kriminelët dhe hajdutët do të vjedhin dhe dhunojnë shqiptarët.
Krimi dhe Edi Rama janë të pandashëm. Që të largojmë krimin duhet të largojmë Edi Ramën! Shporrja e Hajdutit Psiqik dhe bandës së tij është jetike për sigurinë dhe jetën e çdo familje shqiptare!#HajdutiPsiqik#RamaIk #ShqipëriaSiEuropa”, shkruan Basha.
Kryebashkiaku i Vorës, Agim Kajmaku, i denoncuar nga Partia Demokratike se e prek Ligji i Dekriminalizimit, pasi, sipas PD-së, “dyshohet se ka qenë i arrestuar/ndaluar në Greqi dhe më pas, ndaj tij është marrë masa e dënimit dhe dëbimit nga autoritetet përgjegjëse greke”, ka publikuar në Facebook disa dokumente.
Më herët, Kajmaku ka sqaruar arsyet e ndryshimit të emrit, duke theksuar se e ka bërë për shkak të biznesit që administronte, për arsye dokumentare.
