Kryedemokrati Basha është shprehur se ajo që bëri Sali Berisha në 8 janar, kishte për qëllim vëllavrasjen mes demokratëve. Basha u kërkoi ndjesë të gjithë shqiptarëve duke u shprehur se ajo qe panë në 8 janar, nuk është Partia Demokratike. Kryedemokrati falenderoi te gjithë demokratët kritikë, qe siipas tij, u distancuan nga dhuna e Sali Berishës. Sipas tij, ky skenar dështoi falë qëndrimit që mbajtën demokratët. Ai apeloi për ringritjen e PD-së, ndërsa shtoi më tej se 8 janari ishte kulmimi i 30 viteve të atyre gjërave që nuk kanë shkuar mirë në shtëpinë e demokratëve.
“Mesazhi i parë i drejtohet demokratëve që sot ndihen të turpëruar nga skenat e dhunës së barbarisë, të organizuara nga mendja e sëmurë e Berishës. U përpoq ta bënte këtë në mënyrën më të shëmtuar. Nuk e meritonte PD këtë.
Është koha më shumë se kurrë të jemi më afër njëri-tjetrit, ti themi të vërtetat në sy. Faktet nuk të lënë në baltë. Gënjeshtra i ka këmbët e shkurtra. Pasi bëri dhunën kundër shtëpisë së demokratëve, Berisha e mohoi këtë, ai kishte ardhur këtu për të shkaktuar vëllavrasje mes demokratëve.
Ky skenar dështoi dhe dështoi falë qëndrimit që mbajtën demokratët. Edhe të atyre demokratëve që janë kritikët e mi. Kur e panë që kriminelët e marrë nga Berisha nisën dhunën, ata u distancuan. U kërkoj ndjesë të gjithë shqiptarëve dhe uroj që ato pamje mos ti ngelen gjatë në kujtesë. Ajo është dhuna e një njeriu që është në panik dhe dëshpërim dhe që kërkon t’ja faturojë shqiptarëve.
Është koha për tu rindërtuar nga rrënojat e 8 janarit. Një parti e hapur dhe normale. Kjo nuk mund të ndodhë pa një reflektim. 8 janari ishte kulmimi i 30 viteve të atyre gjërave që nuk kanë shkuar mirë në shtëpinë e demokratëve.
Ajo nuk është PD, por një grusht huliganësh të instrumentarizuar nga Sali Berisha. PD do të jetë më e hapur. Ndryshimin nuk e do Berisha dhe Rama, këta të dy janë investuar që ta përçajnë PD. Gjuha e tyre është e koordinuar mirë. Më 8 janar, skenari i dhunës së Berishës jo vetëm nuk pati sukses, por i tregoi botës së qëllimi ishte dhuna”, tha Basha.
