Kryetari i Partisë Demokratike, Lulzim Basha ka zhvilluar sot disa takime në Malësinë e Madhe, ku ka kërkuar zbardhjen e vrasjes së dy vëllezërve në Shkodër, si dhe ka paraqitur planin e tij të biznesit.
“Vrasja duhet të zbardhet se aty ka edhe njerëz që janë përfshirë në mënyrë të pafajshme. Të zbardhen ose shteti ka dorë” deklaroi Basha.
Ndërkohë, një pronar biznesi në Koplik iu drejtua Bashës duke i thënë se qytetarët në Shkodër ndihen të rrezikuar.
“Ne kemi frikë në Shkodër me dalë me pi kafe”, tha qytetari.
Sipas Bashës, dëshpërimi vjen pasi nuk ekziston drejtësia në vend, ndërsa shtoi se ky sistem duhet shembur, pasi vendi është kapur nga pesë oligarkë me në krye kryeministrin Rama.
Më tej, Basha i garantoi biznesit të vogël se kur të vijë ai në pushtet, asnjë tatimor nuk do t’i shkojë më në derë t’i kërkojë ryshfete.
“Me ardhjen tonë në pushtet ne kemi një plan biznesi ku ju do të paguani vetëm, 0.5 % të xhiros vjetore. Do të vendosim një letër në derë që nuk do të vijë asnjë nga këto të tatimores që të kërkojnë ryshfete. Do punoni të qetë dhe do të rrisni ekonominë tuaj edhe të Shqipërisë duke shtuar edhe numrin e të punësuarve”, tha Basha.
