Pas asaj të së shtunës ku nuk munguan përplasjet dhe aktet e dhunës, opozita protestoi sot në një protestë marshim. Pavarësisht reshjeve të shiut, protestuesit ishin të shumtë në numër.
Marshimi nisi nga sheshi Skënderbej, vazhdoi në Kryeministri, Drejtoria e Përgjithshme e Policisë, Parlamenti, Ministria e Brendshme dhe Drejtoria e Policisë së Tiranës.
Gjatë protestës pati disa incidente, tek Kryeministria e Parlamenti u hodhën tymuese dhe flakadanë. Po ashtu tek Drejtoria e Përgjithshme e Policisë edhe Ministria e Brendshme. Molotov u përdor vetëm tek Policia e Tiranës, ndërsa në asnjë rast policia nuk reagoi.
Sakaq, në fjalën e tij para protestuesve, kryetari i PD-së, Lulzim Basha, tha se nuk ulen të dialogojnë me Ramën. “Sot treguam se nuk ka forcë mbi tokë të na ndalë për kauzën tonë, për zgjedhje të lira e të ndershme, nuk ka forcë të detyrojë të ulemi e të bëjmë pazar me të keqen.
E keqja duhet të ikë për t’i hapur vend Shqipërisë si gjithë Evropa. Në një kohë kaq të shkurtër, në njoftim për 24 orë për mbi 3 orë kur s’ka pushuar shiu, jemi edhe më të vendosur edhe më të qartë, për të sakrifikuar gjithçka për demokracinë për lirinë. Le të jetë e sotmja mesazhi i vendosmërisë absolute me të cilën do ta vazhdojmë këtë betejë. Forca e popullit të bashkuar…”.
