Kryetari i PD-së Lulzim Basha ka zhvilluar një takim me Presidentin e Parlamentit të Austrisë, Z. Wolfgang Sobotka.
Përmes një postimi në rrjetin social Facebook, Basha bën me dije se i ka shprehur atij mirënjohjen për mbështetjen e Austrisë për Shqipërinë dhe integrimin e vendit në BE si dhe vendosmërinë e PD për forcimin e bashkëpunimit dypalësh.
Reagimi i plotë i Bashës: “Kënaqësi të prisja në një takim Presidentin e Parlamentit të Austrisë, Z. Wolfgang Sobotka të cilit i shpreha mirënjohjen për mbështetjen e Austrisë për Shqipërinë dhe integrimin e vendit në BE dhe vendosmërinë e PD për forcimin e bashkëpunimit dypalësh.
Bashkëbiseduam me kryeparlamentarin austriak mbi krizën politike, kushtetuese dhe institucionale në Shqipëri, reformën zgjedhore dhe atë në drejtësi, presionin ndaj lirisë së medias si dhe zhvillimet në rajonin e Ballkanit Perëndimor.
Patëm dakordësi të plotë se udhërrëfyesi për daljen nga kriza e thellë politike e institucionale që po kalon vendi, dhe për të zhbllokuar rrugën e integrimit europian të Shqipërisë, është zbatimi i 9 kushteve të Bundestagut. Zgjedhjet e lira e të ndershme janë hapi i parë drejt zgjidhjes së krizës dhe rikthimit të shpresës dhe mundësive për çdo shqiptar”.
