Kryetari i PD-së Lulzim Basha përgjatë një video-konference me gazetarët, theksoi se në përballjen me koronavirusin, qeveria shqiptare të bëjë të paktën sa Kosova.
“Ne duhet të veprojmë si një familje. Sot, jo nesër, të plotësojmë paketën me të paktën sa buxheti i Kosovës. Sot, sa më parë t’ju vijë në ndihmë familjeve në nevojë dhe bizneseve”, u shpreh Basha.
Ky i fundit i mëshoi faktit se vendi është në krizë kombëtare dhe i propozoi qeverisë që të ndjekë planin e opozitës, pasi sipas Bashës, është i realizueshëm.
“Sot duhet të përsëris kërkesën urgjente për anulimin me vendim të qeverisë të të gjithë koncesioneve. Kjo të bëhet në mënyrë që të mbështeten të gjitha shtresat sociale.
Qeveria nuk thotë se çfarë do të bëhet me 30 mijë biznese të vogla.
Kemi një paketë anemike. Çfarë do të bëhet me dhjetëra dhe mijëra të papunë? Çfarë do të bëhet me mbi 70 mijë familje që nuk përfitojnë nga kjo paketë?
Çfarë do të bëhet me ambulantët, me fermerët, çfarë do të bëhet me qindra dhe mijëra të biznesve që janë mbyllur? Plani që i kemi kërkuar është i bëshëm. Kërkojmë paketë të plotë”, deklaroi Basha.
