Numri i viktimave si pasojë e koronavirusit është rritur në Maqedoninë e Veriut duke shkuar në 10.
Ministri i Shëndetësisë Venko Filipçe tha se viktima e 10-të, një grua 65-vjeçare nga Llabunishta e Strugës, vuante nga disa sëmundje kronike para se të infektohej edhe me koronavirusin e ri.
Sot në MV janë regjistruar 25 raste të reja ndërsa numri i përgjithshëm i të infektuarve ka arritur në 354.
Filipçe përgjatë një deklarate për mediat theksoi se Maqedonia e Veriut ka kapacitete të mjaftueshme për trajtimin e pacientëve me Covid-19.
Ai i mëshoi faktit se piku i pandemisë së virusit pritet të arrihet në fund të muajit prill.
“Kemi situatë dinamike në të gjitha zonat e vendit. Pikun e presim diku nga fundi i muajit prill. Mund të thuhet lirisht se sistemi shëndetësor është i përgatitur të pranojë numër më të madh të pacientëve”, ka deklaruar Filipçe.
Ndërkohë numri i personave të shëruar ka arritur në 17.