Për ministrin Pandeli Majko, Basha dhe Rama janë në kufijtë e kohës për të nxjerrë vendin nga kjo krizë që i ka pllakosur. Këtu nuk bëhet fjalë që palët të bëjnë pazar, por të gjejnë gjuhën e përbashkët, që gjithçka ti kthehet normalitetit.
I ftuar në “Top Talk”, ministri i Shtetit për Diasporën, Pandeli Majko, tha se “Edi Rama dhe Lulzim Basha duhet të ulen jo për të bërë pazar, por për të nxjerrë Shqipërinë nga një qerthull”.
“Në fund fare dikush do të humbasë, por ndonjëherë në politikë humb duke fituar, dhe fiton duke humbur”, u shpreh Majko.
Duke iu referuar aktualitetit politik, Majko theksoi se precedenti që po vendos opozita është i rrezikshëm:
“Çfarë precedenti po hap Shqipëria? Nëse kemi këtë precedent që opozita nuk hyn në zgjedhje për X kryeministër, kthehet në model pastaj. Opozita duhet të pyesë veten se çfarë ndodh pas kësaj.
Ja e morën pushtetin. Pas 6 muajsh dorëzojmë ne mandatet, dhe themi nuk e duam këtë kryeministër.
Mendoj se jemi klasë politike që po mbyll ciklin e vet, dhe është e sigurtë që në zgjedhjet që vijnë, dikush do të lërë jo vetëm karrigen e politikës. Prandaj është ky polarizim në këtë moment”.
