Kreu demokrat Lulzim Basha, ka paralajmëruar dje se pas Berishës “non grata”, do të jenë presidenti Ilir Meta dhe kryeministri Edi Rama. Teksa i ka dalë në mbrojtje vendimit të SHBA-së, Basha tha në “Open” se vendosi ta përjashtonte Berishën, pasi i ka thënë shprehimisht se para interesave të tij, nuk vë interesat e demokratëve. Po ashtu ai paralajmëroi se së shpejti do t’i vijë radha edhe të atyre që ai e quan trekëndëshi i Bermudës, përfshirë Ilir Metën dhe Edi Ramën.
“Që nga qershori e deri në 9 shtator, unë kam qenë i angazhuar që Berisha të përmbushte zotimin e dhënë demokratëve, të mos bëhej barrë dhe pengesë për demokratët. Më ka thënë se nuk kam ndërmend të vendos asnjë para interesit tim personal dhe as demokratët. SHBA nuk janë ish-Bashikimi Sovjetik, dhe nuk do ishin këta që janë nëse do vepronin si një vend ish-komunist. Kanë instrumentat e tyre dhe janë ata që kur komunistët shqiptarë i thyen zgjedhjet e ’91, na dolën në krah në ’92 dhe kështu e larguam komunizmin në Shqipëri.
Pas SHBA-së, Shqipëria nuk do ishte në NATO. SHBA-të nuk marrin vendime politike. Do t’i vijë dita edhe brinjëve të tjera të trekëndëshit të Bermudës, por nuk jam as unë, as ti që përcaktojmë shpejtësinë e intitucioneve amerikane.
Unë nuk jam mashë e askujt dhe këtë e kam provuar me akte, jo me fjalë. Kur unë kam bindjen se në lojë janë interesat kombëtare, nuk ka gjë përveç Zotit të më ndalojë mua. Këtu ishin interesat e demokratëve përballë atyre të Berishës, dhe sigurisht që do zgjidhja ato të demokratëve. SHBA-të e ka shpallur “non grata”, dhe Rama duhet të ishte shpallur me kohë “non grata”. E vetmja gjë që kam në dorë unë dhe jam përgjegjës para demokratëve, është ta mbroj apo thërrmoj interesin e demokratëve”, tha Basha.
Sali Berisha u përjashtua nga grupi i partisë që themeloi 30 vite më parë. Kryetari i PD-së, Lulzim Basha zgjidhi dilemën duke zgjedhur Amerikën përpara liderit historik të së djathtës shqiptare.
