Lulzim Basha pritet të mbledhë sot grupin parlamentar të Partisë Demokratike. Mbledhja në fjalë do të mbahet në orën 09:30, gjysmë orë para nisjes së seancës plenare të Kuvendit.
Ende nuk dihet se çfarë do të diskutojë kryedemokrati Basha me deputetët në selinë blu, por pritet që mes tyre të jenë dhe ndryshimet në marrëveshjen e kompanisë së prodhimit të vaksinve, Pfizer dhe qeverisë shqiptare. Këto ndryshime janë pjesë e rendit të ditës në seancën e sotme të Kuvendit dhe pritet të votohen. Gjithashtu, nuk përjashtohet mundësia që Basha të ketë në plan dhënien e porosive për debatet në Kuvend.
Nga ana tjetër, ish-kryeministri Sali Berisha nuk ndalet me sulmet ndaj liderit demokrat Lulzim Basha. Berisha ka komentuar dje vizitën e kryeministrit dhe liderit demokrat në Slloveni. Në fjalën e tij nga “Foltorja” në Gjirokastër, Berisha e cilësoi Bashën si një politikan që ka frikë nga vota. Madje, ish-kryeministri Berisha shtoi se Lulzim Basha nuk i fitoi zgjedhjet e 25 prillit, dhe nuk e ndoqi çështjen e votave të manipuluara, por ndoqi çështjen e karriges së tij.
