Kreu i Partisë Demokratike, Lulzim Basha, ka njoftuar se sot në orën 11:30 do të dalë në një konferencë të jashtëzakonshme për mediat. “Përshëndetje. Në 11:30 kryetari Basha, konferencë për shtyp. Sinjali me link dhe fiber. Kamerat për shkak të protokollit nuk do lejohen. Gazetarët janë të ftuar për pyetje. Linku për pak”, njofton selia blu.
Nuk dihet se për çfarë do të flasë kreu i PD-së. Disa nga çështjet krysore mbi të cilat mund të flasë është kriza ekonomike, zgjedhjet e 25 prillit 2021 dhe miratimi i ndryshimeve në Kodin Zgjedhor.
Nga ana tjetër, Partia Demokratike duket e vendosur për të çuar përpara procesin e përzgjedhjes së kandidatëve për deputetë, sa u takon zgjedhjeve parlamentare të 25 prillit të vitit 2021. Dje PD ka nisur fazën finale për skanimin e kandidatëve për deputetë.
Të shtunën u mbyllën edhe votimet në qarkun e Tiranës, dhe tashmë 495 emra kanë kaluar dy fazat e para të përzgjedhjes. Nga i gjithë procesi në 12 qarqeve të vendit, janë skualifikuar 17 emra, ku bien në sy emrat e tre ish-kryebashkiakëve, atij të Kukësit, Bashkim Shehu, ish-kryebashkiakut të Tropojës, Besnik Tusha dhe ish-kryebashkiaku i Pogradecit, Eduard Kapri. Po kështu janë skualifikuar edhe tre ish deputetë, Klevis Balliu dhe Hekuran Hoxhalli në qarkun e Korçës dhe Astrit Veliaj në Berat dhe bashkë me ta dhe 11 emra të tjerë zyrtarësh demokratë.
